Горадня: у гэтым доме жыў Быкаў!

Каля гарадзенскіх дамоў, дзе жыў беларускі пісьменнік Васіль Быкаў, актывісты кампаніі «Гавары праўду» ўсталявалі памятныя шыльды.

Пра акцыю расказвае Зміцер Бандарчук, кіраўнік грамадскай ініцыятывы па Гарадзеншчыне:

«Акцыя ўжо зрабілася традыцыяй, мінулагодняя была большая. Тады Уладзімір Някляеў перадаў сваю прэмію гарадзенскаму музею Васіля Быкава. А сёлета акцыя ўключала таксама экскурсію па музеі Быкава».

Музей Быкава ў Горадні — гэта маленькі пакойчык на 13,5 метраў, які месціцца на цэнтральнай пешаходнай вуліцы Савецкая.

«Падчас мінулагодняй акцыі, — працягвае Зміцер, — умацаваныя намі шыльды правіселі месяц, а колькі правісяць сёлета, пакажа час».

А два гады таму актывісты «Гавары праўду» перадалі ў Гарадзенскі гарвыканкам больш за 7 тысяч подпісаў жыхароў горада за тое, каб адна з цэнтральных вуліц называлася імем Васіля Быкава. Аднак рашэння пра перайменаванне вуліцы да сённяшняга дня няма.

Крыніца: Будзьма разам!

20 июня 2012