+375 29 853-40-17

info@zapraudu.info

У Бярозаўскім раёне ўлады «перагнулі» са сьвіной чумой

У мястэчку Малеч на Берасьцейшчыне адбыўся сход, на якім сяляне выказалі чыноўнікам незадавальненьне забаронай трымаць сьвіней. Абяцаюць разбрацца.

EF5EC426-7FA6-4B6D-A766-FDF9C8BB806E_w640_r1_s

Чыноўнікі апраўдваліся, казалі, што штрафаваць сялянаў ня будуць, але і пагражалі, што калі раптам у Малечы зьявіцца афрыканская чума сьвіней, то гэта будзе на сумленьні вяскоўцаў.

За кілямэтар ад мястэчка Малеч Бярозаўскага раёну знаходзіцца фэрма, якая належыць Бярозаўскаму камбікормаваму заводу. Менавіта з-за гэтай фэрмы некалькі год вяскоўцам было забаронена трымаць сьвіней — чыноўнікі такім чынам перастрахоўваліся на выпадак зьяўленьня афрыканскай чумы.

Аднак тры месяцы таму ўрад выдаў пастанову аб зьмяншэньні буфэрных зонаў вакол фэрмаў з 5 кілямэтраў да 500 мэтраў. Раней у зону траплялі 17 вёсак Бярозаўскага раёну. Людзі мусілі перабіць сваіх сьвіней. Жыцьцё пасьля гэтага стала прыкметна цяжэйшым, бо з прычыны невысокіх заробкаў у калгасах многія вяскоўцы жывуць фактычна з падсобных гаспадарак.

Так рабілі па ўсёй Беларусі, аднак толькі ў Малечы вяскоўцы ладзілі пратэсты.

4 лютага ў залі сельсавету адбыўся сход жыхароў Малеча і раённых чыноўнікаў, на якім зноў абмяркоўвалася «сьвіная праблема». На сходзе сяляне ўзьнялі перад чыноўнікамі пытаньне: чаму, нягледзячы на пастанову ўраду, у вёсцы працягваюць штрафаваць за ўтрыманьне сьвіней.

На сходзе прысутнічаў намесьнік старшыні Бярозаўскага райвыканкаму па сельскай гаспадарцы Міхаіл Крэйдзіч, іншыя чыноўнікі. Яны тлумачылі, што адбыліся перагібы і што з гэтай сытуацыяй разьбяруцца.

9E9834E7-E2AC-412F-BB6A-C3453CB37E74_w640_r1_s

Сяляне ўздымалі пытаньне аб ліквідацыі фэрмы каля Малеча. Абгрунтоўвалі гэта тым, што яна пабудаваная каля пяцідзесяці гадоў таму і не адпавядае сучасным патрабаваньням.

Адказ быў такі, што паколькі фэрма належыць камбікормаваму заводу, дык ён і павінен прымаць рашэньне аб яе закрыцьці. Разам з тым чыноўнікі запэўнілі сялянаў, што фэрма адпавядае санітарным нормам.

Сход быў досыць эмацыйны:

Спадар: «У нас нічога ня здарылася, а вы вырэзвалі… Вам яшчэ страляць засталося. 20 базавых штрафу — гэта бздура…»

Другі спадар: «Нашто людзей было страшыць?! Нашто?..»

На сходзе выступіў фэрмэр Аляксандар Аліхвер, якога ў 2013 годзе ўлады змусілі перабіць сотні сьвіней. Спадар заявіў, што ўлады ігнаруюць праблемы простых грамадзянаў, і параўнаў дзеяньні ўладаў з працай «арганізаванай злачыннай групоўкі», якая кіруецца толькі сваімі інтарэсамі:

«Вы вінаваціце чалавека ў парушэньні правілаў, якія ў дадзены момант на тэрыторыі Рэспублікі Беларусь ня дзейнічаюць…»

A109E33C-B29E-40B1-AA2A-4134804A7BDD_w640_r1_s

Бярозаўскія чыноўнікі прызналі, што ёсьць цяганіна з прыняцьцем рашэньня райвыканкаму, якое мае дазволіць трымаць сялянам сьвіней. Але віну за гэта ўсклалі на абласных чыноўнікаў — маўляў, у вобласьці доўга марудзяць зь юрыдычнымі пытаньнямі.

На сходзе выступіў актывіст кампаніі «Гавары праўду» і сацыял-дэмакратычнай партыі Валянцін Лазарэнкаў. На мінулых парлямэнцкіх выбарах Лазарэнкаў быў кандыдатам у дэпутаты па гэтай акрузе, але саступіў, паводле афіцыйных дадзеных, праўладнаму кандыдату. У сваім эмацыйным выступе Лазарэнкаў усклаў віну за праблемы вяскоўцаў на мясцовыя ўлады:

«Я бачыў той, савецкі нават, Малеч. У згодзе вырашаліся пытаньні, і не было такіх сходаў спрэчных і скандальных. Значыць, улада цяпер і на ўзроўні сельсавету, і на раённым узроўні нешта ня так робіць…»

Валянцін Лазарэнкаў настойваў, што старая фэрма каля Малеча павінна быць зачыненая, тады і адпадзе праблема з утрыманьнем сьвіней простымі сялянамі.

Падобны «сьвіны бунт» у Малечы ўжо быў увесну 2014 году, а празь некаторы час стала вядома, што Берасьцейскі аблвыканкам хадайнічаў ва ўрад аб зьмяншэньні буфэрных зонаў вакол фэрмаў.

У Бярозаўскім раёне ўвосень 2013 году жыхары 17 вёсак мусілі зьнішчыць пагалоўе сьвіней на сваіх падворках.

З ініцыятывы ўладаў сьвіней у вёсках забіваюць дзеля прафіляктыкі «афрыканскай чумы сьвіней». Пры гэтым бярозаўскія чыноўнікі кажуць, што ніводнага выпадку захворваньня сьвіней на гэтую чуму ў раёне не было.

«Радые Свабода»

6 февраля 2015

Коментарии

Добавить комментарий

Вы должны быть авторизованы для комментирования.

 
А также…
«Апазіцыя павінна прадстаўляць грамадства!» Андрэй Дзмітрыеў абмяркоўвае пасланне Аляксандра Лукашэнкі